تخيلوا معاي جسم انسان يبدو انه طبيعي وكامل الاعضاء
تخيلوا الان انه لايوجد في جسم الانسان هذا خليه واحده ، اكرر لايوجد.
بالتالي كيف باعتقادكم راح يكون عنده قلب او كبد او جلد او دم ؟!!
راح يكون هذا الانسان مجرد مجسم غير حي يتكون من اسمنت او ورق او اي جماد لا حياه فيه
الخلايا ترتبط معاً لتكون الانسجة ، والانسجة ترتبط ببعضها لتكون الاعضاء، والاعضاء ترتبط ببعضها لتكون جسد حي ينبض ويتنفس ويتحرك.
وكل ذلك بامر الواحد جل جلاله.
مقدمه فلسفيه ربما توصل فكرتي لشرح بسيط لفكره تخصصي الجميل الي للأسف مظلوم من قبل المجتمع
والدارسين له بنظرهم فشله ماقدرو يدخلون الطب البشري وانتهى حالهم بتخصص مهين نهايته عينات بول وبراز وديدان فقط لا اكثر ولا اقل متجاهلين حقيقه انهم حاصلين على شهاده طبية محترمه وعندهم العلم الكافي لانقاذ حياة اي شخص ممكن يحتاجهم.
المنظومه الصحية تحتاج الى فريق متكامل الافراد للتشخيص الصحيح للمريض الواحد فما بالك بجميع المرضى ؟
الطبيب يكشف عالمرض ويشخص الاعراض ويطلب عمل تحاليل من اخصائي المختبر
{ احب افكر فيها كتحقيقات دقيقه 👌}
واللي بدرونا كأخصائيين راح يكون عندنا فكره اوليه عن الامراض اللي يعاني منها المريض ومسبباتها ونرسل شغلنا للطبيب الي بدون دورنا هذا مستيحل يعالج المريض ، الطبيب راح يرسل التشخيص ونتيجة التحاليل للصيدلاني اللي بدوره راح يوصف الدوا الصحيح لعلاج مريضنا .
لسه مافصلنا ادوار الممرضين واخصائيين الاشعه وغيرهم كثير بس كلهم فيهم الخير والبركه ولا يمكن للطبيب العمل بدونهم.
ايش هي المختبرات الطبية ؟
علم طبي عظيم
طيب ايش ندرس فيه ؟
كل شي ممكن تتخيله وله علاقه بجسم الانسان بتفاصيل اكثر من اي تخصص طبي ثاني ، ندرس جسم الانسان واعضائه وانسجتة وخلاياه ، بكل تفاصيلها الدقيقه وتغيراتها، العوامل الخارجية الي تأثر بالانسان وتسببله المرض على المستوى الخلوي زي البكتريا والفيروسات والفطريات والطفيليات ، كيف نكتشفها ايش مصدرها ايش تسبب للمريض من اعراض وايش هو التكنيك اللي تستخدمه عشان تسبب المرض للخلايا ، وكل مخلوق خلوي له اختبار مختلف عن الثاني بمواد كيميائية تختلف عن بعض وكل تحليل له نتيجة مختلفه عن الثاني تماماً.
طيب ايش كمان ؟
ندرس امراض الدم ، اشكال كريات الدم الحمراء وكميتها على ايش تدل هل الانسان صحيح ام مريض ، هل هي كرويه كامله ام كرويه مجوفه ام مقروضه؟!!!
هل المريض يعاني من فقر الدم ولا خلايا الدم المنجلية ولا ثلاسيميا ولا امراض كثير ثانيه
طيب اذا يعاني من انيميا ايش نوعها ؟ ، على فكره الانيميا لها اشكال وانواع وليست نوع واحد
طيب خلايا الدم البيضاء هل هي نوع واحد ولا نواع ؟!!!
كل نوع ايش لونه ؟ ، لا مو ابيض له الوان ونقط وتفاصيل وكل نوع من انواع خلايا الدم البيضاء لها وظيفه تختلف عن الثانيه
واحنا لازم نعرف كل نوع هل فيه نقصان ولا زياده اذا ناقص ايش الامراض المحتمله واذا زايده ايش فيه مخاطر صحيه .
طيب اذا عدد خلايا الدم البيضاء طبيعي جداً بس شكلها غريب لونها او النقط اللي فيها زايده او ناقصه وايش ممكن تسبب من امراض، ايوه تماما النقط اللي موجودة بداخل الخليه شايفين قد ايش الموضوع دقيق 😄
هل المريض يعاني من سرطان الدم ام لا ؟!!
طيب هل يوجد كائن طفيلي ساكن داخل خلايا الدم او بينها ؟!!
هذي التساؤلات محد يعرف جوابها اولا غير اخصائيين المختبر 💗
كمان زيادة
عمركم سمعتم او قرأتم عن الامراض المناعيه ؟
هي عباره عن جنون يصيب كريات الدم البيضاء بحيث تبدأ تهاجم خلايا الجسم الاخرى زي مثلا خلايا الدم ، او الخلايا العظميه او الخلايا الجلديه الخ الخ.
نحن من يستطيع اظهار حقيقه هذه الامراض ✋
طيب الامراض الوراثية ؟
حاله جينيه نادره تصيب مريض بعله في القلب او تكسر خلايا الدم او عمى مفاجئ والامراض الوراثيه كثيره لا تعد وولا تحصى .
طيب ايش مصدر الجين المعطوب هل هو من الاب ام الام ام انه طفره وراثية حصلت بسبب عدم انقسام الحمض النووي بشكل صحيح ؟
لايمكن لاي طبيب مهما كان متمرس وخبير ان يعالج المريض اذا ماكان يعرف الجواب ، وبالتالي في الامراض الوراثيه لايمكن انه يشخص المريض او يعالجه من دون اخصائيين المختبرات ❤
طيب مين سمع عن علم الانسجة ؟
اللي يتالف منها كل الجسم كيف ندرس تغيراتها الخارجية والمايكروسكوبية ، وجمالها الخاطف لانفاس بعد صبغها .
في قسم علم الانسجة او الهيستولوجي ندرس كل خليه في كل مكان في الجسم بحاله الصحه ، المرض ، البلوغ ، الحمل والولادة.
بتفاصيل دقيقه جدا دقيقه لدرجة نقدر نلاحظ اي تغيير ممكن يأدي للامراض السرطانية .
المختبرات الطبيه كان رغبتي الثالثه واللي دخلته باقتناع تام وحبيت تخصصي بشكل لا يمكن تصوره
لقيت انه العالم تحت المايكروسكوب جميل بشكل ماينوصف في كل حالاته
الجمال المخيف للخلايا في حالات المرض
والجمال المبهر في حالات الصحة
وفيها كلها اتأمل عظمه خلق الله بشكل يومي
اتامل عالم فريد من نوعه لايراه اغلب البشر.
💜🙏
وجدت انه فن حقيقي بتدرجاته بداية من طريقه تحديد المكان الصحيح للاورده واختيار الزاويه الصحيح لسحب الدم الى فرد العينه باحترافيه على الشرائح وصبغها بالمواد الكيميائية الصحيحة لأتامل تنوع اشكالها تحت عدسة المجهر.
وجدت انه فن حقيقي بتدرجاته بداية من طريقه تحديد المكان الصحيح للاورده واختيار الزاويه الصحيح لسحب الدم الى فرد العينه باحترافيه على الشرائح وصبغها بالمواد الكيميائية الصحيحة لأتامل تنوع اشكالها تحت عدسة المجهر.
اتمنى اكون اجبت عن تساؤل اغلب الطلاب المستجدين ، ووسعت مدارك من لم يعلم بجمال هذا التخصص العظيم.
🙏
اذا اعجبكم البوست واستمتعتم وانت تقرأوه شاركوه مع غيركم
واذا عندكم اي اسألة اكتبولي في التعليقات 💜
ـكوثر فارس.
